AQBU - Timlilit tis 13 n tmedyazt n tmaziɣt n Ṣummam Ad tili d tajmilt i Ahmed Lahlou


Mazal yettkemmil ujerred n yimedyazen i yebɣan ad ttekkin deg temlilit tis mraw d kraḍet (13) n tfaska taɣelnawt n tmedyazt tamaziɣt n Ṣummam, ara d-yilin seg 26 alamma d 29 deg duğember 2019. Ma d ass aneggaru ideg i ilaq ad awḍen yisefra n wid yebɣan ad ttekkin, ad yili ass n 30 seg waggur n unbir ideg nella. Tettili-d tuzna n yisefra ɣer tansa-agi taliktrunit: aecatamedyazt@gmail.com , acu kan ur ilaq ad iseddu usizwer isem-is neɣ uṭṭun n usiwel-is deg yisefra-agi ara yazen. Ma d wid neɣ tid yebɣan ad ttekkin deg tfaska-agi-agi n tmedyazt deg tezrigt-is tis 13, ilaq fell-asen ad aznen 3 n yisefra-nsen, yettwarun s ttawil n uselkim, s tutlayt n tmaziɣt, yerna s usekkil alatini.

Ɣef wakken i t-id-nnan yimsuddsen n leqdic-agi deg wulɣu-nsen, ad d-yili uqbel usɣerbel n yisefra-agi sɣur teseqqamut n uktazal, uqbel timsizzelt. Syin akkin, wid i d-textar teseqqamut-a, ad asent-siwel tddukkla-a i wakken ad ttekkin deg temsizzelt-a ara d-yilin gar 26 d 29 duǧember 2019. Ma d timlilit n tmedyazt, i d-ttheggi yal aseggas tddukkla “Itri adelsan n Uqbu”, i d- yettilin deg Uxxam n yilmeẓyen Abderreḥman Fares n temdint n Uqbu, deg lwilaya n Bgayet. Timlilit-agi n useggas-a ara-d-yilin seg 26 alamma d 29 deg duğember 2019, ad tt-gen d tajmilt i unaẓur d umedyaz ameqqran Ḥmed Laḥlu. D tiɣri yettkemmilen i yiḥeddaden n wawal neɣ d win yettewzanen awal deg usefru-s, yesfek kan ad yili yiles-is d amaziɣ daya.

Imi d timsizzelt ara yesqerdcen tamedyazt tamaziɣt s tmeslayin-is yemgaraden: taqbaylit, tacenwit, tamahaqt…atg. Am wakken diɣ, i d-gren tiɣri yimsuddsen-agi ama i yimedyazen yesɛan ammuden, i wakken ad ten-senzen s ubuddu. Ama d wid irebḥen arrazen deg temliliyin iɛeddan, i wakken ad ilin d inebgawen n lɛezz d lḥerma. Yetturaǧu ad yili wahil n tfaska-agi d anesbaɣur; gar yisaragen ɣef tmedyazt, timsikniyin yemxalafen, asenzi s yibuddan n yidlisen ladɣa wid n tmedyazt, tajmilt i Ḥmed Laḥlu.

Ad d-nesmekti kan belli tafaska-agi tesnulfa-tt-id tddukkla-agi deg useggas n 2005, yal aseggas yettili-d deg-s umaynut, ama deg leqdicat, ama deg wahil neɣ deg usuddes. Afud igerrzen i yimedyazen ara yettekkin deg temsizzelt-agi.